नुवाकोटको विकास र समृद्धि नेकपा एमालेको नेतृत्वमा मात्र सम्भव हुने एमालेको दाबी

 नेकपा एमालेका नेता तथा पूर्वमन्त्री योगेश भट्टराईले नुवाकोटको विकास र समृद्धि नेकपा एमालेको नेतृत्वमा मात्र सम्भव हुने दाबी गरेका छन्। उनले नुवाकोटको बेलकोटगढी  नगरपालिकामा आयोजित दोस्रो नगर अधिवेशनको उद्घाटन गर्दै नुवाकोटले पर्यटन, जलविद्युत् र व्यापारका क्षेत्रमा अपार सम्भावना रहेको बताए।

उनका अनुसार केरुङ-काठमाडौँ रेलमार्ग निर्माणपछि नुवाकोटको विकासमा ठूलो कायापलट हुने छ। "पहिले प्रधानमन्त्री केपी शर्मा ओलीले रेल ल्याउने कुरा गर्दा धेरैले मजाक गरे, तर अहिले त्यो सम्भव भइरहेको छ। नेपालभन्दा जटिल भूगोल भएका देशहरूमा रेल सञ्चालन भएको छ भने नेपालमा पनि यो सम्भव छ," उनले भने।

भट्टराईले नुवाकोटका महिलाहरूलाई आयआर्जन र रोजगारी सिर्जना गर्नेतर्फ अग्रसर हुन आग्रह गर्दै पुरुषहरूलाई व्यवसाय विस्तारमा लाग्न सुझाव दिए। "पर्यटनलाई नुवाकोटको आर्थिक गतिविधिको केन्द्र बनाउँदा समृद्धि सम्भव छ। केरुङ नाका हुँदै जलविद्युत् निर्यात गर्ने अवसर पनि छ, जसले देशकै अर्थतन्त्रमा योगदान दिन्छ," उनले भने।

उनले एमालेकै नेतृत्वमा नुवाकोटको समृद्धि सम्भव हुने दाबी गर्दै भने, "नुवाकोटमा पर्यटन, जलविद्युत्, र व्यापारका क्षेत्रमा रहेको सम्भावनालाई मूर्त रूप दिन एमाले मात्र सक्षम छ।"

उनले केरुङ नाका हुँदै चीनतर्फ जलविद्युत निर्यात गर्ने सम्भावना औँल्याउँदै यसले नुवाकोटलाई समृद्ध बनाउनेमा आफू विश्वस्त रहेको बताए। "एमालेको अग्रसरतामा मात्रै समृद्ध नुवाकोट बन्छ," उनको दाबी छ