झापा, बिर्तामोड – बाल गायक सचिन परियारको असामायिक निधनपछि, झापा बिर्तामोडका झाँक्री राजु श्रेष्ठमाथि आत्मा बोलाएर समाजमा विकृति फैलाउने आरोप लागेको छ। समाजिक सञ्जाल र विभिन्न माध्यममा सचिनको आत्मा बोलाएको नाममा सार्वजनिक भावनामा खेलबाड भएको र सामाजिक सद्भाव भड्काउने गतिविधि गरेको भन्दै आलोचना भइरहेको छ।
नेपाल झाँक्री संघका अध्यक्ष चेतबहादुर थिङले यस विषयमा कडा आपत्ति जनाउँदै नेपाल राष्ट्रिय धामी वैद्य संघका अध्यक्ष सिताराम पुरीलाई फोनमार्फत तुरुन्तै कारबाही गर्न आग्रह गरेका छन्। उनले यस्ता गतिविधिले झाँक्री समुदायको प्रतिष्ठामा आँच पुर्याउने र समाजमा अनावश्यक अराजकता निम्त्याउने चेतावनी दिएका छन्।
सचिन परियार, जो आफ्नो सुमधुर गायनले बाल्यकालमै चर्चामा आएका थिए, उनको असामयिक निधनले सम्पूर्ण देश शोकमा डुबेको छ। यस्तै संवेदनशील घडीमा झाँक्री राजु श्रेष्ठले आत्मा बोलाएको दाबी गर्दै समाजिक सञ्जालमा विभिन्न हल्ला फैलाएको आरोप लागेका छन्।
नेपाल राष्ट्रिय धामी वैद्य संघका अध्यक्ष सिताराम पुरीले यस विषयमा छानबिन गर्न प्रतिवद्धता जनाएका छन्। उनले भने, "यस्ता कार्य कुनै पनि हालतमा स्वीकार्य हुँदैन। झाँक्री समुदायको मर्यादा बचाउन दोषीमाथि कडा कारबाही गरिनेछ।"
यस घटनाले झाँक्री समुदायभित्रै पनि आन्तरिक बहस उत्पन्न गराएको छ। समाजले पनि यस्ता कार्य रोक्न सम्बन्धित निकायलाई पहल गर्न आग्रह गरेको छ।
बाल गायक सचिन परियारको आत्माको नाममा गरिएका कार्यले समाजमा विभाजन र अराजकता निम्त्याउने सम्भावना देखिएको छ। यस्ता घटनालाई नियन्त्रण गर्न सरकारी निकाय र संघ-संस्थाले चाँडै कदम चाल्न आवश्यक छ।
Comments
Post a Comment