सिसहनियाँ|दाङ देउखुरीको राप्ती गाउँपालिकामा स्थित चार सामुदायिक विद्यालयका तीन सयभन्दा बढी विपन्न विद्यार्थीलाई शुक्रबार न्यानो कपडा र शैक्षिक सामग्री वितरण गरिएको छ।
गाउँपालिकाको सहकार्यमा क्रियटिङ पोसिबिलिटिज (सिपी) नेपाल संस्थाले बाल विकासदेखि कक्षा ५ सम्मका विद्यार्थीलाई जाडो मौसमका लागि न्यानो कपडा र शैक्षिक सामग्री प्रदान गरेको हो। यस कार्यको उद्देश्य विद्यालयमा अध्ययन गर्न कठिनाइ भोगिरहेका र आर्थिक अवस्था कमजोर भएका विद्यार्थीहरूको शैक्षिक उपलब्धि सुधार्नु रहेको छ।
राप्ती गाउँपालिकाका अध्यक्ष प्रकाश विष्टको रोहबरमा आयोजित कार्यक्रममा नेपाल राष्ट्रिय माध्यमिक विद्यालय भालुबाङका १४२, बाल कल्याण आधारभूत विद्यालय पहरुवाका ११, सगरमाथा प्राथमिक विद्यालय भुल्केका ४५ र सरस्वती आधारभूत विद्यालय छोट्की सिसहनियाँका ७३ जना विद्यार्थीलाई न्यानो कपडा प्रदान गरिएको थियो।
त्यस्तै, सरस्वती आधारभूत विद्यालय छोट्की सिसहनियाँका कक्षा ६ देखि ८ सम्मका ६५ जना विद्यार्थीलाई स्टेशनरी सामग्री वितरण गरिएको जानकारी सिपी नेपाल संस्थाकी महिला सशक्तीकरण संयोजक सरिता चौधरीले दिइन्।
यसअघि पनि सिपी नेपाल संस्थाले सर्वोदय माध्यमिक विद्यालय सिसहनियाँ र प्राथमिक विद्यालय थकरीकोटका ८३ जना विपन्न विद्यार्थीलाई न्यानो कपडा र शैक्षिक सामग्री वितरण गरेको थियो।
यो कार्यले विपन्न र परिष्कृत विद्यार्थीहरूको शैक्षिक यात्रा सजिलो र प्रोत्साहक बनाउने विश्वास व्यक्त गरिएको छ।
Comments
Post a Comment