छैठौं अर्घाखाँची महोत्सव पौष २९ देखि माघ १२ सम्म सन्धिखर्कमा हुने

सन्धिखर्क, ६ जनवरी – छैठौं अर्घाखाँची महोत्सव यही पौष २९ गतेदेखि माघ १२ गतेसम्म सन्धिखर्कको कुडेलेफाटमा आयोजना गरिने भएको छ। महोत्सवले स्थानीय व्यवसाय, कृषि, र जिल्लाका उत्पादनहरू प्रवर्द्धन गर्दै ५०% छुटका साथ बिक्रीको व्यवस्था गर्नेछ। साथै, स्थानीय आयआर्जन र उत्पादन प्रवर्द्धनका लागि निःशुल्क स्टलको व्यवस्था गरिएको छ।

उद्योग वाणिज्य संघका अध्यक्ष प्रदीप मिश्रले पत्रकार सम्मेलनमार्फत जानकारी दिँदै भने, “महोत्सवमा करिब ५० हजार दर्शकले अवलोकन गर्ने र ५ करोड रुपैयाँको कारोबार हुने लक्ष्य राखिएको छ।” कार्यक्रमको समुद्घाटन लुम्बिनी प्रदेशका मुख्यमन्त्री चेतनारायण आचार्यले गर्नेछन्।

महोत्सवमा दर्शकहरूको आकर्षण बढाउन स्थानीय, प्रादेशिक र राष्ट्रियस्तरका कलाकारहरू सहभागी हुनेछन्। सांस्कृतिक संयोजक सन्तोष बस्नेतका अनुसार, महोत्सवमा सांस्कृतिक कार्यक्रमलाई विशेष प्राथमिकता दिइनेछ।

गत वर्षझैं यस वर्ष पनि महोत्सवबाट संकलित रकमको केही हिस्सा सामाजिक क्षेत्रमा खर्च गरिने आयोजकले जनाएको छ। महोत्सवले जिल्लाको आर्थिक गतिविधि र पर्यटन प्रवर्द्धनमा थप योगदान पुर्याउने अपेक्षा गरिएको छ।